రణ్‌వీర్ సింగ్ హీరోగా ఆదిత్య ధార్ తెరకెక్కించిన ధురంధర్ బాక్సాఫీస్ దగ్గర సృష్టించిన బీభత్సం గురించి ప్రత్యేకంగా చెప్పక్కర్లేదు. ముఖ్యంగా ఓ బాలీవుడ్ సినిమా గురించి చాన్నాళ్ల తర్వాత పాన్ ఇండియా లెవల్లో ప్రేక్షకులు మాట్లాడుకొని చాన్నాళ్లే అయిపోయింది. అలాంటి సమయంలో ధురంధర్ అటు ఉత్తరాదితో పాటు ఇటు దక్షిణాది ప్రేక్షుకుల్ని కూడా ఆకట్టుకుంది. ఇక ధురంధర్‌కి సీక్వెల్‌గా 'ధురంధర్ ది రెవెంజ్' తెరకెక్కింది.మొదటి పార్ట్‌ని మించిన యాక్షన్ సీన్లు, కథ, కథనం, రక్తపాతం అన్నీ ఇందులో ఉంటాయని ట్రైలర్ చూస్తేనే అర్థమైంది. అందులోనూ హిందీతో పాటు పాన్ ఇండియా లెవల్లో దక్షిణాది భాషలన్నింటిలోనూ చాలా గ్రాండ్‌గా ఈ సినిమాని రిలీజ్ చేశారు. అందుకు తగ్గట్లే ప్రీమియర్ షో బుకింగ్స్‌కి కూడా భారీ రెస్పాన్స్ వచ్చింది. అయితే తెలుగుతో పాటు తమిళ ప్రీమియర్ షోలు రద్దు కావడం ఆడియన్స్‌ని నిరాశపరిచింది. అయితే హిందీ ప్రీమియర్లు కూడా కొన్ని క్యాన్సిల్ అయినప్పటికీ చాలా చోట్ల అయితే ప్రీమియర్ పడింది. మరి ధురంధర్ 2 ఎలా ఉంది..? ఆడియన్స్‌కి మొదటి పార్ట్ ఇచ్చినంత కిక్కు ఇచ్చిందో లేదో చూద్దాం.మొదటి పార్ట్ కథ క్లుప్తంగాభారత్‌పై ఉగ్రవాదాన్ని అడ్డుపెట్టుకొని పాకిస్థాన్ చేస్తున్న మారణహోమాన్ని అంతం చేయాలంటే ఆపరేషన్ ధురంధర్ చేపట్టాల్సిందేనని భారత ఇంటెలిజెన్స్ బ్యూరీ చీఫ్ అజయ్ సన్యాల్ (మాధవన్) భావిస్తారు. ఈ ఆపరేషన్‌కి పంజాబ్‌లో జైలు జీవితం గడుపుతున్న ఓ కుర్రాడ్ని భారత ఏజెంట్‌గా హమ్జా (రణ్‌వీర్ సింగ్) అనే మారుపేరుతో పాకిస్థాన్‌కి పంపిస్తారు. అక్కడికి ఒక సామ్యానుడిగా అడుగుపెట్టి పాకిస్థాన్‌లో ఓ స్థాయికి ఎలా ఎదిగాడు..? ఎలాంటి ఛాలెంజెస్ ఫేస్ చేశాడనేది ధురంధర్ మొదటి పార్ట్ కథ. రెహమాన్ డెకాయిత్ (అక్షయ్ ఖన్నా) మరణంతో ఈ పార్ట్‌ని ముగించారు. రివెంజ్.. ఆరు ఛాప్టర్లుఇక 'ధురంధర్ ది రివెంజ్' స్టోరీని మొత్తం ఆరు ఛాప్టర్లుగా డివైడ్ చేశాడు డైరెక్టర్ ఆదిత్య ధార్. మొదటి పార్ట్‌లో అసలు పాకిస్థాన్‌కి వెళ్లిన భారత ఏజెంట్ హమ్జా (రణ్‌వీర్ సింగ్) అసలు కథేంటి? హమ్జాగా పేరు మార్చక ముందు జస్కిరాత్ సింగ్ రాంగి జీవితంలో ఏం జరిగింది? ఏ పరిస్థితుల్లో అతను జైలుకి వెళ్లాల్సి వచ్చింది అనే విషయాలు చూపిస్తూ ధురంధర్ 2ని మొదలుపెట్టాడు. హై యాక్షన్ సీక్వెన్స్, ఎమోషనల్ సీన్లతో సినిమాని స్టార్ట్ చేసి.. తర్వాత చూడబోయే రక్తపాతం మరెంత దారుణంగా ఉంటుందో ఫస్ట్ ఛాప్టర్‌తోనే హింట్ ఇచ్చాడు డైరెక్టర్.ఆ తర్వాత జస్కిరాత్‌ని హమ్జాగా పేరు మార్చి పాకిస్థాన్‌కి పంపడం.. అక్కడ రెహమాన్ డెకాయిత్ (అక్షయ్ ఖన్నా) మరణం తర్వాత హమ్జా రాజకీయాల్లో ఎలా ఎదిగాడు. ఏకంగా పాకిస్థాన్‌లో ఒక ప్రభుత్వాన్ని మార్చగలిగే స్థాయికి ఎలా చేరుకున్నాడు. ఓవైపు ల్యారీ నుంచి మొదలుపెట్టి కరాచీ వరకూ ఎలా తన కనుసన్నల్లోకి తెచ్చుకున్నాడనేది ధురంధర్ 2లో అసలు కథ. ఇక బడే సాహెబ్ అంటూ మొదటి పార్టులో ఫుల్ హైప్ ఇచ్చిన వ్యక్తిని హమ్జా కలవడంతో కథలో అసలు మజా వస్తుంది. ఇక ఆ తర్వాత పాకిస్థాన్‌లో హమ్జా వేట ఎలా మొదలైంది..? హమ్జా భారత ఏజెంట్ అని ఎవరైనా తెలుసుకున్నారా? మొత్తానికి ధురంధర్ ఆపరేషన్ సక్సెస్ అయిందా లేదా అనేది మిగిలిన కథ.ఎలా ఉందంటే?ధురంధర్ 2 సినిమా రన్‌టైమ్ సరిగ్గా 3 గంటల 49 నిమిషాలు. అంటే దాదాపు 4 గంటలు లెక్కేసుకోండి. ఇంతసేపు ఆడియన్స్‌ని సీట్లలో కూర్చోబెట్టాలంటే కథలో ఖచ్చితంగా మంచి పట్టు.. కథనంలో బిగువు ఉండాల్సిందే. ఈ విషయంలో డైరెక్టర్ ఆదిత్య ధార్ చాలా వరకూ సక్సెస్ అయ్యారు. పంజాబ్‌లోని ఓ సాధారణ ఆర్మీ జవాన్ కొడుకైన జస్కిరాత్.. హమ్జాగా మారాల్సిన పరిస్థితి ఎందుకొచ్చింది..? అనే విషయాన్ని చాలా బలంగా చూపించాడు. ఇక దేశభక్తితో జవాన్ అవుదామనుకున్న కుర్రాడ్ని అదే దేశంలోని రాజకీయం ఒక హంతకుడ్ని చేసిన తీరు.. ఎమోషనల్‌గా అనిపిస్తుంది. ఇక అలాంటి కుర్రాడ్ని.. అజయ్ సన్యాల్ (మాధవన్) మళ్లీ దేశం కోసం ప్రాణం ఇచ్చే ఏజెంట్‌లా మారడానికి ఎలా ఒప్పించారు.. అనేది కూడా ఆడియన్స్‌ని కన్విన్స్ చేసేలానే సాలిడ్‌గా చూపించారు. ఇక రెహమాన్ డెకాయిత్ (అక్షయ్ ఖన్నా) మరణం తర్వాత ల్యారీలో చెలరేగిన అల్లర్లు.. అతని సోదరుడు ఉజెయిర్ బలోచ్‌ని చాలా తెలివిగా హమ్జా ట్యాకిల్ చేసిన తీరు.. ఇవన్నీ మెప్పిస్తాయి. ఇక పాకిస్థాన్ రాజకీయాల్లో హమ్జా ఎదిగిగిన తీరు.. దాని కోసం వేసిన ఎత్తులు కూడా ఆడియన్స్‌కి కిక్కిస్తాయి. ముఖ్యంగా మన దేశానికి నరేంద్ర మోదీ ప్రధాని అయిన తర్వాత జరిగిన పలు ముఖ్యమైన ఇన్సిడెంట్స్‌ అయిన నోట్ల రద్దు, ఉరి సర్జికల్ స్ట్రైక్స్, పాకిస్థాన్‌లో ఉగ్రవాదంపై తీసుకున్న చర్యలు ఇలాంటివాటిని చాలా బలంగా, క్లియర్‌గా చూపిస్తూ వాటిని స్టోరీకి లింక్ చేయడంలో కూడా ఆదిత్య ధార్ తన పనితనం చూపించాడు. ఇక ఇంటెర్వెల్ బ్యాంగ్ కూడా ఆడియన్స్‌కి మాంచి కిక్కిస్తుంది. ఎస్పీ అస్లాం చౌదరి (సంజయ్ దత్), మేజర్ ఇక్బాల్ (అర్జున్ రాంపాల్)ని బోల్తా కొట్టిస్తూ హమ్జా వేసిన ఎత్తులు అదిరిపోతాయి. అలానే ఎప్పుడైతే హమ్జా భారత ఏజెంట్ అని తెలుస్తుందో అప్పటి నుంచి కథలో అసలు మజా మొదలవుతుంది. సెకండాఫ్‌లో కూడా మొత్తం పాకిస్థాన్‌లో ఉన్న ఉగ్రవాదులు, భారత్‌కి వ్యతిరేకంగా పనిచేసే పలువుర్ని ఏరిపారేసే సీన్లు ఇవన్నీ కూడా విజిల్స్ వేయిస్తాయి. ఇక మొదటి పార్ట్‌లో బాగా హైప్ ఇచ్చిన బడే సాహెబ్ ఎవరనేది థియేటర్లో చూస్తేనే ఆడియన్స్‌కి ఆ కిక్కు వస్తుంది. అలానే హమ్జాని ప్రేమించి పెళ్లి చేసుకున్న ఎలీనా (సారా అర్జున్)కి కూడా ఇందులో రెండు మూడు బలమైన సీన్లు పడ్డాయి. ఇక క్లైమాక్స్‌లో ఒక పాత్రలో ఇచ్చిన ట్విస్ట్ మాత్రం ఆడియన్స్‌కి మంచి మజాని ఇస్తుంది.రణ్‌వీర్ యాక్టింగ్‌గా షేర్ధురంధర్ సినిమాలో రణ్‌వీర్ యాక్టింగ్ ఏ రేంజులో ఉంటుందో అక్షయ్ ఖన్నాకి కూడా అదే రేంజులో ప్రశంసలు వచ్చాయి. అయితే ధురంధర్ 2లో మాత్రం రణ్‌వీర్ ఎవరికీ ఆ ఛాన్స్ ఇవ్వలేదు. అసలు సినిమా మొదలైనప్పటి నుంచి చివరి నిమిషం వరకూ అసలు ఆ పాత్రకి రణ్‌వీర్ తప్ప వేరెవరూ న్యాయం చేయలేరేమో అన్నట్లుగా ఆడియన్స్‌ని కట్టిపడేశాడు. ఫ్యామిలీ కోసం అన్యాయానికి వ్యతిరేకంగా తిరగబడిన కుర్రాడిగా, దేశం కోసం ఏజెంట్‌గా మారి ప్రాణాల్నే లెక్కచేయని వ్యక్తిగా, కింగ్ ఆఫ్ ల్యారీగా మొదలై.. కరాచీ కా బాద్‌షా.. బలోచీ కా షేర్ ఇలా ఎత్తు ఎదుగుతున్న ప్రతిసారి.. ఆయా స్థాయిల్లో రణ్‌వీర్ కనిపించిన తీరు వేరే లెవల్లో ఉంటుంది. యాక్షన్ సీక్వెన్సుల్లో ఎంత క్రూరంగా కనిపించాడో ఎమోషనల్ సీన్లలో అంతలా కంటతడి కూడా పెట్టించే నటన కనబరిచాడు రణ్‌వీర్. ఇప్పటివరకూ రణ్‌వీర్ కెరీర్‌లో చేసిన పాత్రలు ఎంత పేరు తెచ్చాయో.. ధురంధర్‌లో పోషించిన హమ్జా పాత్ర కూడా అంతకంటే ఎక్కువే పేరు తెస్తుంది. ఇక అజయ్ సన్యాల్‌గా మాధవన్ నటన కూడా చాలా బావుంది. చాలా కూల్‌గా కనిపిస్తూ దేశం కోసం ఎత్తులు వేసే ఇంటెలిజెన్స్ చీఫ్ పాత్రలో మాధవన్ నటన శభాష్ అనిపిస్తుంది. ఇక సంజయ్ దత్ మరోసారి తన నటనతో అదరగొట్టారు. అర్జున్ రాంపాల్ పాత్ర కూడా చాలా దీటుగా కనిపిస్తుంది. ఇక సారా అర్జున్ పాత్రకి స్కోప్ తక్కువే అయినా కూడా ఉన్న సీన్లలో మెప్పించింది. ఇక మిగిలిన పాత్రల్లో నటించిన నటీనటులు కూడా అందరూ మంచిగా యాక్ట్ చేశారు.ఇక సినిమాలో వయెలెన్స్ గురించి ప్రత్యేకంగా చెప్పాల్సిన అవసరం లేదు. ఎందుకంటే సినిమా మొత్తం చాలా సీన్లు రక్తపాతంతోనే ఉంటాయి. అయితే A సర్టిఫికేట్ సినిమా కాబట్టి ఆ మాత్రం ఎక్స్‌పెక్ట్ చేసే వస్తారు ఆడియన్స్. కానీ వాళ్ల అంచనాలకి మించే వయలెన్స్ సీన్లు ఉన్నాయి. కానీ ఆ వయలెన్స్‌ని కూడా ఆడియన్స్ కన్విన్స్ అయ్యే విధంగానే డైరెక్టర్ తీశాడు. ఇక మ్యూజిక్ సినిమాలో యాక్షన్ సీక్వెన్సులని మరో స్థాయికి తీసుకెళ్లింది. ఇక క్లైమాక్స్‌ మాత్రం కాస్త ల్యాగ్ అయిందనే ఫీలింగ్ కలిగిస్తుంది. ఓవరాల్‌గా అయితే ధురంధర్ సినిమాని ఇష్టపడిన వాళ్లకి ఈ పార్ట్ 2 కూడా బాగా నచ్చే ఛాన్స్ ఉంది. అయితే అంత సేపు థియేటర్లో కూర్చోలేం అనేవాళ్లకి మాత్రం కాస్త ల్యాగ్ అనిపించొచ్చు. కానీ ఓవరాల్‌గా అయితే రణ్‌వీర్ ఇరగ్గొట్టేశాడు. ఒక్క ముక్కలో చెప్పాలంటే.. ఊహకి మించిన వయలెన్స్.. ధురంధర్ బబ్బర్ షేర్