Latest PSB FD Interest Rates: మీరు పెట్టుబడులు పెడుతుంటారా.. పోస్టాఫీస్ స్కీమ్స్, స్టాక్ మార్కెట్స్, మ్యూచువల్ ఫండ్స్, ఫిక్స్‌డ్ డిపాజిట్లు, గోల్డ్, రియల్ ఎస్టేట్.. వీటిల్లో ఏది ఎంచుకుంటుంటారు. ఇక్కడ వేటికవే ప్రత్యేకతను కలిగి ఉంటాయి. స్టాక్స్, మ్యూచువల్ ఫండ్స్ రిస్క్‌తో కూడుకొని ఉంటాయి. గోల్డ్ సురక్షిత పెట్టుబడి సాధనమే. కానీ అనిశ్చితి ఉంటుంది. ఇక పోస్టాఫీస్ స్కీమ్స్, బ్యాంక్ ఎఫ్‌డీలు స్థిరంగా రిటర్న్స్ ఇస్తాయి. పోస్టాఫీస్ స్కీమ్స్ ఎక్కువగా అధిక టెన్యూర్‌తో ఉంటాయి. ఇక ఫిక్స్‌డ్ డిపాజిట్లు పెద్దగా రిస్క్ లేని పెట్టుబడి. వేర్వేరు టెన్యూర్లపై వడ్డీ రేట్లు వేర్వేరుగా ఉంటాయి. సాధారణ ప్రజలతో పోలిస్తే.. సీనియర్ సిటిజెన్లకు చాలా బ్యాంకులు అదనంగా 50 బేసిస్ పాయింట్ల వరకు అధిక వడ్డీ ఆఫర్ చేస్తుంటాయి. కొన్ని స్పెషల్ టెన్యూర్లపై ఇంకా ఎక్కువ వడ్డీ అందిస్తుంటాయి. ఫిక్స్‌డ్ డిపాజిట్ వడ్డీ రేట్లు అన్ని బ్యాంకుల్లో ఒకేలా ఉండవు. బ్యాంకుల్ని బట్టి మారుతుంటాయి. సాధారణంగా ప్రభుత్వ బ్యాంకుల్లో కంటే ప్రైవేట్ బ్యాంకుల్లో.. ప్రైవేట్ బ్యాంకుల్లో కంటే ఇతర స్మాల్ ఫైనాన్స్ బ్యాంకుల్లో అధిక వడ్డీ ఆఫర్ చేస్తుంటాయి. అయితే ప్రభుత్వ బ్యాంకులు సేఫ్ అని చెప్పొచ్చు. దేశంలోని ప్రముఖ ప్రభుత్వ బ్యాంకుల్లో ఎఫ్‌డీ రేట్లు ఎలా ఉన్నాయి.. అలాగే ఎక్కువ వడ్డీ ఏ టెన్యూర్‌పై వస్తుందో చూద్దాం. ప్రభుత్వ రంగ బ్యాంకుల్లో అత్యధికంగా పంజాబ్ అండ్ సింద్ బ్యాంక్.. సీనియర్ సిటిజెన్లకు 666 రోజుల టెన్యూర్‌పై అత్యధికంగా 7.25 శాతం వడ్డీ ఆఫర్ చేస్తోంది. బ్యాంక్ ఆఫ్ మహారాష్ట్ర 400 రోజుల వ్యవధి డిపాజిట్‌పై 7.15 శాతం వడ్డీ అందిస్తోంది. మిగతా వాటిల్లో ఎలా ఉన్నాయో తెలుసుకుందాం. అతిపెద్ద ప్రభుత్వ రంగ బ్యాంకు.. స్టేట్ బ్యాంక్ ఆఫ్ ఇండియాలో సీనియర్ సిటిజెన్లకు 5-10 ఏళ్ల డిపాజిట్‌పై అత్యధికంగా 7.05 శాతంగా వడ్డీ రేటు ఉంది. ఇక్కడ ఏడాది, మూడేళ్లు, ఐదేళ్ల డిపాజిట్లపై వరుసగా వడ్డీ రేట్లు 6.75 శాతం, 6.8 శాతం, 7.05 శాతంగా ఉన్నాయి. సూపర్ సీనియర్ సిటిజెన్లకు (80 ఏళ్లు పైబడిన వారు) అదనంగా 10 బేసిస్ పాయింట్ల వరకు వడ్డీ వస్తుంది.యూనియన్ బ్యాంక్ ఆఫ్ ఇండియాలో అత్యధికంగా 444 రోజుల టెన్యూర్‌పై 7.10 శాతం వడ్డీ రేటు ఉంది. 1, 3, 5 ఏళ్ల ఎఫ్‌డీపై వరుసగా 6.8, 6.75, 6.50 శాతంగా ఉన్నాయి. సూపర్ సీనియర్ సిటిజెన్లకు అదనంగా 25 బేసిస్ పాయింట్ల వరకు వడ్డీ వస్తుంది. పంజాబ్ నేషనల్ బ్యాంకులో 444 రోజుల టెన్యూర్ డిపాజిట్‌పై అత్యధికంగా 7.10 శాతం వడ్డీ రేటు ఉంది. 1, 3, 5 ఏళ్ల డిపాజిట్లపై వరుసగా 6.75 శాతం, 6.8 శాతం, 6.6 శాతంగా ఉన్నాయి. ఇండియన్ బ్యాంక్, ఇండియన్ ఓవర్సీస్ బ్యాంకుల్లో 444 రోజుల టెన్యూర్‌పైనే 7.10 శాతం వడ్డీ రేటు ఉంది. కెనరా బ్యాంకులో 555 రోజుల టెన్యూర్‌పై అధికంగా 7.10 శాతం, బ్యాంక్ ఆఫ్ ఇండియాలో 450 డేస్- స్టార్ స్వర్ణిమ్ కింద అధికంగా 7.10 శాతం వడ్డీ రేటు ఉంది.