ప్రధానమంత్రి ఫోటోను మార్ఫింగ్ చేసి సోషల్ మీడియాలో పోస్ట్ చేసినందుకు గానూ.. ఓ కాంగ్రెస్ నేతకు ఘోరమైన అవమానం జరిగింది. మహారాష్ట్రలోని డోంబివాలి ప్రాంతంలో ఉన్న ఒక కాంగ్రెస్ నాయకుడికి బీజేపీ కార్యకర్తలు ఘాటుగా బుద్ధి చెప్పారు. ప్రధాని మోదీని అవమానిస్తూ నెట్టింట వేసిన పోస్ట్‌ పట్ల తీవ్ర ఆగ్రహం చెందిన బీజేపీ నాయకులు అతడిని నడిరోడ్డుపై చీర కట్టి తమ నిరసనను వ్యక్తం చేశారు. ఈ ఘటన ప్రస్తుతం రాజకీయ వర్గాల్లో తీవ్ర చర్చనీయాంశంగా మారింది.డోంబివాలి ప్రాంతానికి చెందిన కాంగ్రెస్ పార్టీ సీనియర్ కార్యకర్త ప్రకాష్ అలియాస్ మామా పగారే సోమవారం.. తన ఫేస్‌బుక్‌లో ఒక వీడియోను షేర్ చేశారు. ఆ వీడియోలో ప్రధాని నరేంద్ర మోదీ చీర కట్టుకున్నట్లుగా మార్ఫింగ్ చేసి ఉన్న ఒక ఫోటో ఉంది. దానికి ఫేమస్ మరాఠీ పాట “మి కాషాలా అర్షాత్ పహు గా”ను కూడా యాడ్ చేశారు. ఇక ఆ వీడియోను షేర్ చేస్తూ.. దానికి “క్షమించండి అమ్మాయిలు, నేను కూడా ట్రెండ్‌లో ఉండాలనుకుంటున్నాను” అనే క్యాప్షన్‌ను కూడా పెట్టి పోస్ట్ చేశారు.ఇక ఈ వీడియో కాస్తా నెట్టింట తెగ వైరల్ కావడంతో.. కాషాయ పార్టీ శ్రేణులు తీవ్ర ఆగ్రహం వ్యక్తం చేశారు. ఈ పోస్ట్ బీజేపీ కళ్యాణ్ జిల్లా యూనిట్‌కు తీవ్ర ఆగ్రహం తెప్పించింది. ప్రధానమంత్రి నరేంద్ర మోదీని అవమానించారని ఆరోపిస్తూ బీజేపీ కార్యకర్తలు.. మామా పగారేకు తగిన బుద్ధి చెప్పాలని నిర్ణయం తీసుకున్నారు. ఈ క్రమంలోనే మంగళవారం ఉదయం పగారే డోంబివలి (తూర్పు)లోని మన్పాడ రోడ్డు సమీపంలో మామా పగారే ఉన్నారని సమాచారం అందుకున్న బీజేపీ కళ్యాణ్ జిల్లా చీఫ్ నందు పరాబ్.. మండల అధ్యక్షుడు కరణ్ జాదవ్ సహా పలువురు స్థానిక బీజేపీ కార్యకర్తలు మామా పగారేను ముట్టడించారు.సాధారణంగా తెల్లటి కుర్తా, పైజామా, నల్లటి బూట్లు ధరించే మామా పగారేను చుట్టుముట్టిన బీజేపీ కార్యకర్తలు.. స్థానిక బట్టల దుకాణం నుంచి రూ.5 వేల విలువైన కొత్త పట్టు చీరను తీసుకొచ్చి.. బలవంతంగా అతడికి నడిరోడ్డుపైనే కట్టారు. ఈ ఘటనపై బీజేపీ కళ్యాణ్ జిల్లా అధ్యక్షుడు నందు పరాబ్ స్పందించారు. సోషల్ మీడియాలో ఎవరైనా బీజేపీ సీనియర్ నాయకులను కించపరచడానికి ప్రయత్నిస్తే.. తాము అదే విధంగా స్పందిస్తామని తీవ్ర హెచ్చరికలు జారీ చేశారు. ప్రధానమంత్రిని అగౌరవపరిచినందుకు గానూ.. మామా పగారేకు బహిరంగంగా ఇలా చీర కట్టాల్సి వచ్చిందని తేల్చి చెప్పారు. ఇలాంటి మార్ఫింగ్ వీడియోలు చేసే వారికి ఇది ఒక హెచ్చరిక అని వార్నింగ్ ఇచ్చారు.