అమెరికా అధ్యక్షుడు డొనాల్డ్ ట్రంప్ ఇటీవల పెంచిన హెచ్1బీ వీసా ఫీజు.. 'అమెరికన్ డ్రీమ్' ఆశలపై నీళ్లు చల్లింది. ట్రంప్ నిర్ణయంతో 71 శాతం హెచ్1బీ వీసా లబ్ధిదారులుగా ఉన్న భారతీయులకు గందరగోళ పరిస్థితి ఏర్పడింది. అమెరికాలో స్థిరపడాలని కలలు కన్న విద్యార్థులకు కూడా ఈ నిర్ణయం గొడ్డలిపెట్టులా మారింది. దీనివల్ల చాలా మంది కెరీర్లు గాడి తప్పుతాయని, వారి కుటుంబాలు విచ్ఛిన్నమవుతాయనే భయాందోళనలు నెలకొన్నాయి. దీంతో చాలా మంది ప్రత్యామ్నాయ మార్గాల కోసం చూస్తున్నారు. అలాంటి వారి కోసం పలు యూరప్ దేశాలు రెడ్ కార్పెట్ పరుస్తున్నాయి. తమ దేశానికి రండి అంటూ.. భారతీయులను ఆకర్షించే ప్రయత్నాలు చేస్తున్నాయి. ఈ నేపథ్యంలో అమెరికాకు ప్రత్యామ్నాయంగా నిలిచే, భారతీయులకు మంచి అవకాశాలు అందిస్తున్న యూరోపియన్ దేశాల గురించి ఇప్పుడు తెలుసుకుందాం. యూరప్‌లో పలు దేశాలను నిపుణుల కొరత వేధిస్తోంది. ఖాళీలను భర్తీ చేయడానికి కంపెనీలు చాలా అవస్థలు పడుతున్నాయి. అందుకే బయటి దేశాల నుంచి నైపుణ్యం కలిగిన వర్కర్లను నియమించుకోవడానికి ఆసక్తి చూపిస్తున్నాయి. ఇది భారతీయ నిపుణులు మంచి అవకాశం అని చెప్పొచ్చు. అమెరికాతో పోలిస్తే ఎంట్రీ సులభం. పోటీ కూడా తక్కువగా ఉంటుంది. భారతీయులను ఆకర్షిస్తున్న ఆ యూరప్ దేశాలు ఇవే. జర్మనీఈ లిస్ట్‌లో జర్మనీ అగ్రస్థానంలో ఉంది. యూరప్‌లో అతిపెద్ద ఆర్థిక శక్తిగా ఉన్న ఈ దేశంలో.. అనేక ప్రపంచ ప్రఖ్యాత కంపెనీలు ఉన్నాయి. ముఖ్యంగా ఐటీ సంబంధిత రంగాల్లో నిపుణుల కొరత ఉంది. దాదాపు 80 శాతం జర్మన్ కంపెనీల్లో టెక్ నిపుణుల కొరత ఉందని సర్వేలు చెబుతున్నాయి. సాఫ్ట్‌వేర్ డెవలపర్లు, డేటా సైంటిస్టులు, ఐటి ఇంజనీర్లకు మంచి డిమాండ్ ఉందని తెలుస్తోంది. అందుకే భారతీయులను తమ దేశంలోకి ఆహ్వానిస్తూ ఇటీవల భారత్‌లోని జర్మనీ రాయబారి ఫిలిప్ అకెర్‌మెన్ సోషల్ మీడియాలో పోస్టు పెట్టారు. అత్యంత నైపుణ్యం కలిగిన భారతీయులను తమ దేశం సాదరంగా ఆహ్వానిస్తోందని.. తమకు స్థిరమైన వలస విధానం ఉందని చెప్పారు. ఐటీ, సైన్స్, సాంకేతిక రంగాల్లో భారతీయులకు మంచి ఉద్యోగ అవకాశాలు కల్పిస్తున్నట్లు వివరించారు. కష్టపడి పనిచేసే ఉత్తమమైన వ్యక్తులకు మంచి ఉద్యోగం ఇస్తామన్నారు. చెక్ రిపబ్లిక్మధ్య ఐరోపా దేశమైన చెక్ రిపబ్లిక్.. టెక్నాలజీ హబ్‌గా శరవేగంగా అభివృద్ధి చెందుతోంది. ఈ దేశ రాజధాని ప్రేగ్.. ప్రముఖ కంపెనీలు, స్టార్టప్‌లకు కేంద్రంగా ఉంది. ఇక్కడ దాదాపు 79 శాతం ప్రధాన కంపెనీలు టెక్ నిపుణుల కోసం వెతుకుతున్నాయని సమాచారం. సాఫ్ట్‌వేర్ కంపెనీలు కూడా ఇక్కడ పెద్ద సంఖ్యలో కార్యాలయాలను ఏర్పాటు చేస్తున్నాయి. దీంతో ఐటీ ట్యాలెంట్‌కు డిమాండ్‌ మరింత పెరిగే అవకాశం ఉంది. సాఫ్ట్‌వేర్ డెవెలప్‌మెంట్ (వెబ్, మొబైల్, క్లౌడ్), ఆటోమేషన్, ఇండస్ట్రీ 4.0 ఇంజినీర్లు, డేటా అండ్ సైబర్ సెక్యూరిటీ రోల్స్‌కు ప్రస్తుతం డిమాండ్ ఉంది. నైపుణ్యం కలిగిన వర్కర్లకు వర్క్ పర్మిట్లు ఇస్తారు. మాల్టామధ్యధరా తీరంలో మాల్టా దేశం ఉంది. చిన్న దేశమే అయినా.. ఇక్కడ ఐటీ నిపుణులకు మంచి డిమాండ్ ఉంది. మాల్టాలోని 84 శాతం కంపెనీలకు టెక్ నిపుణుల అవసరం ఉందని సర్వేలు చెబుతున్నాయి. ఐ-గేమింగ్, ఫిన్‌టెక్, బ్లాక్‌చైన్ సంబంధిత సేవల కంపెనీలు.. నిపుణుల కోసం వెతుకుతున్నాయి. గేమ్ ఇంజినీర్లు, బ్యాకెండ్ డెవలపర్, పేమెంట్స్ లేదా ఫిన్‌టెక్ ఇంజినీర్, బ్లాక్‌చైన్ డెవలపర్ రోల్స్‌కు మాల్టాలో నియామకాలు జరుగుతున్నాయి. నైపుణ్యం కలిగిన నాన్ ఈయూ వర్కర్లకు మాల్టా వర్క్ పర్మిట్లు ఇస్తోంది. ఆస్ట్రియానాణ్యమైన జీవన ప్రమాణాలకు ఆస్ట్రియా ప్రసిద్ధి చెందింది. ఇప్పుడు టెక్ నిపుణులకు మంచి గమ్యస్థానంగా మారుతోంది. ఇక్కడ దాదాపు 76 శాతం పెద్ద కంపెనీలు ఐటీ ట్యాలెంట్ కోసం వెతుకుతున్నాయి. ఆస్ట్రియా రాజధాని వియన్నా.. పలు మల్టీనేషనల్ కంపెనీలు, స్టార్టప్‌లకు కేంద్రంగా ఉంది. AI/డేటా అనలిటిక్స్, క్లౌడ్, సైబర్ సెక్యూరిటీ, సాఫ్ట్‌వేర్ ఇంజనీర్ రోల్స్‌కు ఇక్కడ డిమాండ్ ఉంది. నిపుణుల కొరత ఉన్న రంగాలతో ఆస్ట్రియా ఓ జాబితా కూడా విడుదల చేయడం గమనార్హం. మరోవైపు, ఇలాంటి నైపుణ్యం గల వర్కర్లకు అమెరికా ఇచ్చే హెచ్1బీ వీసా తరహాలో రెడ్-వైట్-రెడ్ కార్డును అందిస్తోంది ఆస్ట్రియా. లక్సెంబర్గ్విస్తీర్ణంలో చిన్నదే అయినా.. యూరప్‌లో కెల్లా మంచి ఆకర్షణీయమైన శాలరీ ప్యాకేజీలను అందిస్తోంది లక్సెంబర్గ్. క్లౌడ్, ఈ-కామర్స్, ఫిన్‌టెక్ రంగాలకు చెందిన అమెజాన్, పేపాల్ వంటి ప్రపంచ ప్రఖ్యాత సంస్థలకు ఇక్కడ కార్యాలయాలు ఉన్నాయి. లక్సెంబర్గ్‌లోని దాదాపు 75 శాతం ప్రముఖ కంపెనీలు టెక్ నిపుణుల కోసం వెతుకుతున్నాయి. క్లౌడ్ అండ్ డేటా సెంటర్స్, ఈ-కామర్స్, ఫిన్‌టెక్, సైబర్ సెక్యూరిటీ రంగాల్లో సీనియర్ టెక్ రోల్స్‌కు అత్యధిక ప్యాకేజీలు అందిస్తోంది ఈ దేశం. ఇలా ప్లాన్ చేసుకోవాలి..!అమెరికాకు ప్రత్యామ్నాయం కోసం చూస్తున్న నిపుణులు ముందే ప్లాన్ వేసుకోవాలి. మొదటగా, మీరు పని చేస్తున్న రంగానికి, మీ ఆసక్తికి అనువైన దేశం లేదా సిటీని ఎంచుకోవాలి. జర్మనీ అయితే ఇండస్ట్రీలకు ప్రసిద్ధి చెందింది. R&D & స్టార్టప్‌లకు.. ప్రేగ్ మంచి డెస్టినేషన్ అవుతుంది. సీనియర్ రోల్స్‌కు లక్సెంబర్గ్‌లో మంచి శాలరీ ప్యాకేజీలు ఉంటాయి.డిమాండ్‌కు అనుగుణంగా మీ నైపుణ్యాలను సరిపోల్చుకోండి. క్లౌడ్‌లో అయితే AWS/Azure/GCPలో మీకు స్కిల్స్ చెక్ చేసుకోండి. బ్యాకెండ్ (Java/.NET/Go/Python), డేటా ఇంజనీరింగ్, AI/ML, సైబర్ సెక్యూరిటీ, DevOps/SREనైపుణ్యాలు చెక్ చేసుకున్నాక సరైన వీసా మార్గాన్ని ఎంచుకోండి. ఈయూ బ్లూ కార్డ్ (అధిక వేతనాల ఉద్యోగాలకు ఇచ్చే కార్డ్), జర్మనీ స్కిల్డ్ ఇమ్మిగ్రేషన్ కార్డ్, ఆస్ట్రియా రెడ్-వైట్-రెడ్ కార్డ్‌ ఇస్తుంది. ఇదే కాకుండా వివిధ దేశాల ప్రభుత్వ వెబ్‌సైట్‌లో ఇమ్మిగ్రేషన్, వర్క్ పర్మిట్లు గురించి చెక్ చేయాలి.అనంతరం లింక్డ్‌ఇన్, స్థానిక జాబ్ పోర్టల్స్, యూరప్‌లో ఉన్న రిక్రూట్‌మెంట్ కన్సల్టెన్సీలను సంప్రదించాలి.మీకు వచ్చే జీతం, అక్కడి కాస్ట్ ఆఫ్ లివింగ్, హెల్త్ ఇన్సూరెన్స్, ట్యాక్స్, రీలొకేషన్ ప్యాకేజీల గురించి పూర్తి వివరాలు తెలుసుకోవాలి.దశాబ్దాలుగా అనేక మంది భారతీయుల అమెరికన్ డ్రీమ్‌ను సాకారం చేసింది హెచ్1బీ వీసా. ఆకర్షనీయమైన జీతాలు అందుకుంటూ.. ప్రపంచ ప్రఖాత ఆవిష్కర్తలతో పనిచేసే అవకాశాన్ని ఇచ్చింది. కానీ ట్రంప్ నిర్ణయం వల్ల కలలకు బ్రేక్ పడింది. అదే సమయంలో యూరప్ దేశాలు భారతీయ ట్యాలెంట్‌కు రెడ్ కార్పెట్ పరుస్తున్నాయి. స్టెమ్ (సైన్స్, టెక్నాలజీ, ఇంజినీరింగ్, మ్యాథమెటిక్స్) లో అవసరం మేరకు శ్రామిక శక్తి లేకపోవడం, డిజిటైజేషన్ వేగంగా పురోగమిస్తున్నందున యూరప్‌లో ఈ డిమాండ్ ఏర్పడింది. ఇక్కడ ఏఐ, ఈ-కామర్స్ నుంచి సైబర్‌సెక్యూరిటీ వరకు ఏటేటా డిమాండ్ పెరుగుతోంది. అందుకే భారతీయ నిపుణులకు ప్రాధాన్యం ఇస్తున్నాయి. తమ ఆసక్తి, రంగానికి తగిన దేశాలను ఎంచుకుని.. భారతీయ నిపుణులు కొత్త జీవితం ప్రారంభించేందుకు అవకాశాలు పుష్కలంగా ఉన్నాయి.