O vindeiro sábado 26 de outubro, ás 19:30 horas, o Pazo da Cultura de Pontevedra encherase de emoción e poesía cun concerto moi especial de Amancio Prada, que conmemorará o 50º aniversario do seu emblemático disco dedicado á obra de Rosalía de Castro. "Eu non podo esquecer a Rosalía, desde que tiña 10 anos e empecei a escribir as miñas cancións, ela foi a musa, o motivo polo que empecei a cantar e compor", confesa o cantautor berciano. Este álbum, pedra angular na súa carreira, puxo música aos versos de Rosalía e abriu unha ponte entre xeracións, achegando a súa poesía ao corazón de miles de oíntes. Medio século despois, Amancio Prada regresa a esas cancións que marcaron o seu camiño, para revivilas coa madurez e a emoción que dá o tempo. Este recital será moito máis que un concerto: é unha viaxe pola memoria, un reencontro con aqueles primeiros temas de voz espida e alma profunda, agora reinterpretados coa sabedoría que só dan os anos. A voz de Prada, amornada pola experiencia pero sempre fiel ao fervor dos inicios, resoará como un eco sereno e luminoso dese diálogo íntimo con Rosalía. "Non só se trata de celebrar os 50 anos daquel primeiro disco, senón tamén de que a súa poesía siga estando vixente, que se siga sentindo dentro. É darse conta de que unha canción nace e renace cada vez que a cantas", explica. Máis que un aniversario, esta cita é unha cerimonia de gratitude, un agasallo para os que creceron con esas cancións e para os que as descubrirán por primeira vez. Un encontro único onde a música e a palabra volven abrazarse para lembrarnos que a poesía segue latexando no presente. Amancio Prada (Dehesas, León, 1949) é unha das grandes voces da canción de autor en España. Ao longo de máis de cinco décadas soubo tecer un repertorio único, combinando composicións propias con adaptacións musicais de poetas como Lorca, Cunqueiro, Martín Gaite, Rosalía de Castro e moitos máis, desde as Cantigas medievais até os versos contemporáneos. A súa traxectoria foi recoñecida con numerosos premios, entre eles a Medalla de Ouro ao Mérito nas Belas Artes, a Medalla Castelao, o Premio da Cultura Galega ou o galardón da European Guitar Foundation. Desde o seu debut en París en 1972, compartindo escenario con Georges Brassens, actuou nalgúns dos festivais e teatros máis prestixiosos de España e Europa, levando sempre consigo a luz da poesía convertida en canción.