తిలక్ వర్మ.. ఇప్పుడు దేశం మొత్తం మార్మోగుతున్న పేరు ఇది. ఆసియా కప్ ఫైనల్లో అదరగొట్టే బ్యాటింగ్‌తో టీమిండియాను గెలిపించిన తిలక్.. పాకిస్థాన్‌కు అదిరిపోయే పంచ్ ఇచ్చాడు. ఈ తెలుగోడి ఆటకు దేశం మొత్తం ఫిదా అయిపోయింది. హైదరాబాద్ విమానాశ్రయంలో దిగిన .తిలక్ వర్మ అద్భుతమైన ఆటతో టీమిండియాను గెలిపించిన తర్వాత.. ఏపీ సీఎం చంద్రబాబు నాయుడు ఈ యువ క్రికెటర్‌పై ప్రశంసలు గుప్పించారు. మన తెలుగబ్బాయి అంటూ ఆయన ఎక్స్‌లో పోస్టు చేశారు. చంద్రబాబు తనయుడు, మంత్రి లోకేశ్ సైతం తిలక్‌ను అభినందిస్తూ పోస్టు చేశారు. .బీఆర్ఎస్ వర్కింగ్ ప్రెసిడెంట్ సైతం తిలక్ వర్మను అభినందించే క్రమంలో తెలంగాణ బిడ్డ అక్కడ అంటూ ఇన్‌స్టాగ్రామ్‌లో పోస్ట్ చేశారు. దీంతో తిలక్ వర్మ సొంత రాష్ట్రం ఏంటనే చర్చ మొదలైంది. గుంటూరులో పుట్టినతను తెలంగాణ బిడ్డ ఎలా అయ్యిండు? అంటూ కొందరు నెటిజన్లు తెలంగాణ నేతను ప్రశ్నించడం మొదలుపెట్టారు. క్రిక్‌బజ్‌లో తిలక్ వర్మ ప్రొఫైల్ పేజీలో బర్త్ ప్లేస్ గుంటూరు అని ఉండటాన్ని ప్రస్తావిస్తున్నారు. దీనికి కౌంటర్‌గా కొందరు తిలక్ వర్మ పాత ఇంటర్వ్యూ క్లిప్‌ను బయటకు తెచ్చారు. తాను పుట్టి పెరిగింది హైదరాబాద్‌లోనే అని తిలక్ వర్మ అందులో చెప్పాడు. ‘‘నాన్న ఎలక్ట్రికల్ వర్క్ చేస్తారు. అన్నయ్య బీటెక్ పూర్తి చేశాడు, తను బ్యాడ్మింటన్లో నేషనల్ ప్లేయర్. అమ్మానాన్న చిన్నప్పుడు అథ్లెటిక్స్‌లో పాల్గొన్నారు. చిన్నప్పటి నుంచి నాకు ఫ్యామిలీ నుంచి క్రీడల పట్ల ప్రోత్సాహం లభించేది. చిన్నప్పటి నుంచే టెన్నిస్ బాల్‌తో క్రికెట్ ఆడేవాణ్ని. పదేళ్ల వయసులో క్రికెట్‌లో ట్రైనింగ్ తీసుకోవడం మొదలుపెట్టా. నా పేరు ఠాకూర్ తిలక్ వర్మ అని ఉంటుంది. అయితే మేం ఇతర రాష్ట్రాల నుంచి ఇక్కడికి రాలేదు. మా తాతముత్తాల నుంచే ఠాకూర్ అనేది కంటిన్యూ అవుతోంది. నాన్నది చిన్నప్పటి నుంచి మేడ్చల్, అమ్మది భీమవరం. అమ్మానాన్న ఇక్కడే పుట్టారు. నేను కూకట్‌పల్లిలోనే పుట్టాను. మా ఫ్యామిలీ మొత్తం ఇక్కడే. సలాం సార్ దగ్గర క్రికెట్లో శిక్షణ తీసుకున్నా. మొదట్లో ఫాస్ట్ బౌలింగ్ వేసేవాణ్ని.. కానీ ఆయనే స్పిన్‌కు మార్చారు’’ అని తిలక్ వర్మ తన గురించి ఆ ఇంటర్వ్యూలో చెప్పుకొచ్చాడు. తిలక్ వర్మ ఆంధ్రోడా, తెలంగాణోడా అనేది పక్కనబెడితే.. మన తెలుగోడు, అంతకు మించి భారతీయుడు. అంతర్జాతీయ క్రికెట్లో దేశానికి ప్రాతినిధ్యం వహిస్తూ.. పాకిస్థాన్ లాంటి ధూర్త దేశ జట్టు మీద టీమిండియాను గెలిపించి, త్రివర్ణ పతకాన్ని ఎగరేసిన యోధుడు. అతడు తెలుగువాడు కావడం మనందరికీ గర్వకారణం. తిలక్ వర్మనే కాదు.. ఎవరూ రాత్రికి రాత్రే గొప్పవాళ్లు అయిపోరు. ఏళ్ల తరబడి సాధన చేయాల్సి ఉంటుంది. అందుకోసం కుటుంబ సభ్యులు ఎన్నో త్యాగాలు చేయాల్సి ఉంటుంది. ఇలాంటి గొప్ప ఆటగాళ్ల స్ఫూర్తితో కష్టపడితే.. మన పిల్లలను వాళ్ల స్ఫూర్తితో పెంచితే.. మనం కూడా సక్సెస్‌ను అందుకోవచ్చు. అలా కాకుండా.. ఎంత కష్టపడి ఉంటే ఈ స్థాయికి వచ్చాడనే విషయం మర్చిపోయి.. మా కులపోడు, మా రాష్ట్రం వాడు అని చూస్తే.. అతడికి పోయేదేం లేదు, మనకు వచ్చేదేం లేదు. ఈ చర్చలు, పోట్లాటల వల్ల లాభం కేవలం రాజకీయ నాయకులకే, మనకు కాదు.