ఆంధ్రప్రదేశ్ ప్రభుత్వం మళ్లీ ఆ పాత పథకాన్ని అమలు చేసేందుకు సిద్ధమైంది. రాష్ట్రవ్యాప్తంగా ప్రభుత్వ ఆస్పత్రుల్లో ప్రసవించిన తల్లులకు అందజేయనుంది. అయితే తాజాగా ముఖ్యమంత్రి చంద్రబాబు ఆదేశాల మేరకు అదనంగా రెండు వస్తువులను చేర్చారు. దీంతో కిట్‌లో మొత్తం వస్తువులు 13కు చేరాయి.. ఈ మార్పు వల్ల కిట్ ఖర్చు అదనంగా రూ.450 పెరుగుతుంది. ఈ మేరకు అవసరమైన ఏర్పాట్లను వైద్యారోగ్య, కుటుంబ సంక్షేమశాఖ చేస్తోంది.గతంలో ఈ కిట్‌లో దోమ తెరతో కూడిన పరుపు, వాటర్‌ ప్రూఫ్‌ షీటు, దుస్తులు, న్యాప్కిన్లు, తువాలు, సబ్బు, సబ్బు పెట్టె, పౌడర్, ఆయిల్, షాంపూ, బొమ్మ వంటి 11 వస్తువులు ఉండేవి. ఇప్పుడు వీటికి అదనంగా ఫోల్డబుల్‌ బెడ్, ఒక బ్యాగును చేర్చారు. దీంతో కిట్‌లో వస్తువుల సంఖ్య 13కి పెరిగింది. ముఖ్యమంత్రి చంద్రబాబు ఇటీవల ఈ కిట్‌ను పరిశీలించారు. ఆ సమయంలోనే ఫోల్డబుల్‌ బెడ్, బ్యాగును చేర్చాలని ఆదేశించారు. గతంలో ఒక్కో కిట్‌కు సుమారు రూ.1,504 ఖర్చవుతుందని అంచనా వేశారు. ఇప్పుడు కొత్తగా చేర్చిన రెండు వస్తువుల వల్ల అదనంగా రూ.450 ఖర్చవుతుందని తేల్చారు. ఒక్కో కిట్‌కు రూ.1954 ఖర్చు అవుతోంది.కొత్తగా వచ్చిన కూటమి ప్రభుత్వం పథకాన్ని మళ్లీ మొదలుపెట్టాలని నిర్ణయించింది. ఈ పథకం ద్వారా ఏటా సుమారు 3.20 లక్షల మంది తల్లులకు శిశు ఆరోగ్య సంరక్షణ కోసం కిట్లు అందిస్తారు. ముఖ్యమంత్రి ఆదేశాలతో కిట్లలో రెండు కొత్త వస్తువులు చేర్చాల్సి రావడంతో, APMSIDC ద్వారా రూ. 65 కోట్ల అంచనా వ్యయంతో మళ్లీ టెండర్లు పిలవడానికి సిద్ధమవుతున్నారు. ఈ పథకాన్ని 2016లో అప్పటి టీడీపీ ప్రభుత్వం మొదలుపెట్టింది. అప్పట్లో శిశువుల ఆరోగ్య సంరక్షణ కోసం దీన్ని ప్రవేశపెట్టారు. తర్వాత వచ్చిన జగన్‌ ప్రభుత్వం కొన్నాళ్లు నడిపి, ఆపేశారు. ఇప్పుడు కూటమి ప్రభుత్వం దీన్ని మళ్లీ మొదలుపెట్టాలని చూస్తోంది. APMSIDC సంస్థ 26 జిల్లాల్లోని డీఎంహెచ్‌వోలు, డీసీహెచ్‌ఎస్‌లు, జీజీహెచ్‌లకు రెండేళ్ల పాటు 'రేట్‌ కాంట్రాక్ట్‌' పద్ధతిలో కిట్లు సరఫరా చేస్తుంది. గత జూన్‌లో కిట్ల సరఫరా కోసం టెండర్లు పిలిచారు.. చాలా కంపెనీలు ఆసక్తి చూపించాయి. అయితే ఇప్పుడు ముఖ్యమంత్రి ఆదేశాల మేరకు కిట్లలో అదనంగా రెండు వస్తువులు కలపాల్సి వచ్చింది. అందుకే, మళ్లీ కొత్త టెండర్లు పిలవాలని అధికారులు నిర్ణయించారు. అయితే ప్రభుత్వం నిధులు ఇవ్వగానే APMSIDC కొత్త టెండర్లు పిలవడానికి ఏర్పాట్లు చేస్తోంది. మొత్తం మీద ఎన్టీఆర్ బేబీ కిట్‌లను త్వరలోనే పంపిణీ చేయాలని భావిస్తున్నారు.