A conta atrás para o tradicional mercado das flores de Todos os Santos xa comeza a primeiros de outubro. A Concellaría de Promoción Económica, que dirixe Anabel Gulías, fixou os días 7 e 8 de outubro como xornadas de presentación de solicitudes para optar a un dos 24 postos que está previsto que se instalen na praza da Ferraría. O mercado, que se celebrará os días 30 e 31 de outubro coincidindo coa festividade de Todos os Santos, ofrecerá postos de cinco tamaños diferentes: cinco de 2 metros cadrados, dez de 4 metros cadrados, cinco de 6 metros cadrados, un de 8 metros cadrados e tres de 10 metros cadrados. As persoas interesadas deberán acudir ao Servizo de Promoción Económica da Casa da Luz en horario de 9:00 a 12:00 horas durante esas dúas xornadas. A adxudicación realizarase por orde de chegada, polo que se recomenda acudir canto antes. Cada persoa só poderá solicitar un posto e deberá presentar a documentación completa: a solicitude cuberta, o xustificante de pago da taxa por ocupación de vía pública e realizar o abono correspondente. O prazo para completar todo o proceso esténdese ata o 15 de outubro, momento no que se procederá á marcaxe definitiva dos postos na praza..