నేచురల్ స్టార్ నాని హీరోగా నటిస్తున్న ‘ది ప్యారడైజ్‌’ మూవీలో సీనియర్ విలక్షణ నటుడు, కలెక్షన్ కింగ్ మంచు మెహన్ బాబు కీలక పాత్రలో నటిస్తున్న సంగతి తెలిసిందే. శనివారం మెహన్ బాబు ఫస్ట్ లుక్ తో పాటుగా సినిమాలో ఆయన పోషించిన పాత్రకు సంబంధించిన వివరాలను పంచుకున్నారు. అయితే తాజాగా ప్యారడైజ్ నుంచి మరో సర్‌ప్రైజ్‌ వచ్చింది. సెకండ్ లుక్ ను మేకర్స్ రిలీజ్ చేశారు. ‘ది ప్యారడైజ్‌’ మూవీలో శికంజ మాలిక్‌ అనే ప్రతినాయకుడి పాత్రలో మోహన్ బాబు కనిపించనున్నారు. ఫస్ట్ లుక్ లో ఆయన షర్ట్‌ లేకుండా గన్‌, పెద్ద కత్తి పట్టుకుని సిగార్‌ కాలుస్తూ రగ్గడ్‌ లుక్‌లో అందర్నీ ఆశ్చర్యపరిచారు. ఇందులో పవర్‌ ఫుల్ విలన్‌గా నటిస్తున్నట్లు స్పష్టం చేశారు. అయితే ఇప్పుడు వింటేజ్ మెహన్ బాబును గుర్తు చేస్తూ మరో సరికొత్త పోస్టర్ ను లాంచ్ చేశారు. సెకండ్ లుక్ లో మోహన్‌ బాబు ప్రింటెడ్ షర్ట్ వేసుకొని, టక్ చేసుకొని ఆయన హీరోగా చేసినప్పటి 'అసెంబ్లీ రౌడీ', 'బ్రహ్మ' నాటి రోజులను గుర్తు చేశారు. భుజాన పెద్ద గన్ను పట్టుకొని, సిగార్‌ తాగుతూ తనదైన స్వాగ్ చూపించారు. బ్యాగ్రౌండ్ లో ఓల్డ్ మోడల్ కారు, సెటప్ అంతా చూస్తుంటే సినిమాలో మోహన్ బాబుకి ఫ్లాష్ బ్యాక్ ఎపిసోడ్ ఉంటుందనిపిస్తోంది. ''శికంజ మాలిక్‌.. బ్రూటల్‌, మ్యాడ్‌ మ్యాన్‌, స్వాగ్‌, స్టైల్‌, యూనిక్‌.. అతడు విలనిజాన్ని పునర్‌ నిర్వచించడానికే కాదు, విలనిజాన్ని తిరగరాసేందుకు వస్తున్నాడు'' అని చిత్ర బృందం పేర్కొంది. ''ప్రతినాయకుడిగా నటించడం నాకు ఎప్పుడూ ఉత్సాహంగా ఉంటుంది. ‘ది ప్యారడైజ్‌’లో శ్రీకాంత్ ఓదెల రాసిన అత్యంత క్రూరమైన శికంజ మాలిక్ పాత్రను పోషించాను. శ్రీకాంత్ విజన్ రా అండ్ గ్రిప్పింగ్ గా ఉండబోతోంది'' అని మోహన్ బాబు పోస్ట్ పెట్టారు.