Property Loans: చాలా మందికి బ్యాంకుల్లో లోన్ అవసరం పడుతుంది. ఈ మధ్య కాలంలో ఖర్చులు, అవసరాలు అంతలా పెరిగిపోయాయి. దీంతో కాస్త చిన్న మొత్తాల్లో అవసరమైనా బ్యాంకులకు పరుగులు తీస్తారు. చాలా మంది పర్సనల్ లోన్స్ తీసుకుంటారు. ఇక్కడ ఎలాంటి సెక్యూరిటీ ఉండదు కాబట్టి.. వీటిని అన్‌సెక్యుర్డ్ లోన్స్ అంటారు. వీటిపై వడ్డీ రేట్లు చాలా ఎక్కువగా ఉండొచ్చు. అందుకే.. ఒకవేళ మీ దగ్గర స్థిరాస్తులు ఉంటే.. దీనిపైనా లోన్ తీసుకోవచ్చు. అంటే మీ దగ్గర ఆస్తులు ఉన్నప్పటికీ.. ఊహించని ఖర్చులు, ఆర్థిక కార్యకలాపాల కోసం చేతిలో సరిపడా డబ్బుల్లేకుంటే దీనిని ప్రయత్నించొచ్చు. ఇక్కడ మీరు బ్యాంకులో మీ ఆస్తిని తనఖా పెడతారు కాబట్టి ఏ ఇబ్బందీ ఉండదు. అందుకే ఇక్కడ చాలా తక్కువ వడ్డీకే లోన్లు పొందే అవకాశం ఉంటుంది. అవసరానికి ఆదుకుంటుంది. మీరు డబ్బు తిరిగి చెల్లించినప్పుడు తిరిగి యాజమాన్య హక్కులు మీకు వస్తాయి. ఇక్కడ రెసిడెన్షియల్ లేదా కమర్షియల్ స్పేస్‌ను తాకట్టు పెట్టొచ్చు. ఇందులో ఇళ్లు, అపార్ట్‌మెంట్స్, ఇతర మాల్స్, కార్యాలయ భవనాలు వంటివి ఉంటాయి. >> ఇక్కడ వడ్డీ రేట్లు కనీసం 9-12 శాతం మధ్య ఉన్నాయి. ఇది మీ ప్రొఫైల్, లెండర్‌ను బట్టి మారుతుంటుంది. అర్హత విషయానికి వస్తే.. ఎన్నో అంశాలు ప్రభావం చూపిస్తాయి. ప్రాపర్టీ వాల్యూ, మీ ఆదాయం, క్రెడిట్ స్కోరు, తిరిగి చెల్లించగలిగే సామర్థ్యం ఇలా అన్నీ చూస్తాయి. అప్పుడే లోన్ ఎంత వస్తుందో నిర్ణయిస్తాయి. అందుకే.. ఇక్కడ మనం ముందుగా బ్యాంకులు, ఎన్‌బీఎఫ్‌సీల్లో దేంట్లో వడ్డీ రేట్లు, అర్హతలు ఎలా ఉన్నాయో తెలుసుకోవడం ముఖ్యం. ఇక్కడ ముఖ్యంగా మీరు లేదా మీ పిల్లల ఉన్నత చదువుల కోసం, ఆస్పత్రి ఖర్చుల కోసం, వ్యాపార విస్తరణ కోసం, కొన్నిసార్లు ఆస్తి కొనుగోలుపై డౌన్ పేమెంట్ చెల్లించడం కోసం.. ఇలాంటి సందర్భాల్లో లోన్ తీసుకోవచ్చు. ఇక్కడ కనీసం 8.50 శాతం- 9.50 శాతం నుంచి కూడా వడ్డీ రేట్లు ప్రారంభమవుతున్నాయి. గరిష్ట వడ్డీ రేట్ల విషయానికి వస్తే 11-13.5 శాతంగా ఉన్నాయి. ఉదాహరణకు చూస్తే.. హెచ్‌డీఎఫ్‌సీ బ్యాంకులో ప్రాపర్టీ లోన్ వడ్డీ రేట్లు 9.05-13.50 శాతంగా ఉన్నాయి. యాక్సిస్ బ్యాంకులో 9.25-10 శాతంగా ఉండగా.. ఎస్బీఐలో ఇది 9.20-10.50 శాతంగా ఉంది. ఐడీఎఫ్‌సీ ఫస్ట్ బ్యాంకు, కోటక్ మహీంద్రా బ్యాంకులో వడ్డీ రేట్లు 9.50 శాతం నుంచి ప్రారంభమవుతున్నాయి. ఇతర అర్హతల విషయానికి వస్తే.. కనీసం 21-70 సంవత్సరాల వరకు ఉండాలి. వేతన జీవులు లేదా సెల్ఫ్ ఎంప్లాయిడ్ అయి ఉండాలి. ముఖ్యంగా స్థిర ఆదాయం ఉండాలి. సిబిల్ స్కోరు 700 ఆపైన ఉంటే.. లోన్ ఆమోదానికి ఎక్కువ ఛాన్స్ ఉంటుంది. ఇంకా వేగంగా డబ్బులొస్తాయి. వడ్డీ రేట్లలోనూ ఇంకా తగ్గొచ్చు. కచ్చితంగా ఇక్కడ సొంత ఆస్తి అయి ఉండాలి. వివాదరహితంగా ఉండాలి. కమర్షియల్ స్పేస్ కంటే రెసిడెన్షియల్ ప్రాపర్టీలపై వడ్డీ రేట్లు తక్కువగా ఉంటాయి. ఎక్కువ మొత్తం లోన్ కావాలంటే.. ఎక్కువ టెన్యూర్ పెట్టుకోవాలి. ఇక్కడ మీరు దీర్ఘకాలంలో ఎక్కువ తిరిగి చెల్లించాల్సి వస్తుంది.డాక్యుమెంట్ల విషయానికి వస్తే.. ఐడెంటిటీ ప్రూఫ్‌గా ఆధార్, పాన్, పాస్‌పోర్ట్ కావాలి. అడ్రస్ ప్రూఫ్‌గా యుటిలిటీ బిల్స్, రేషన్ కార్డు, ఓటర్ ఐడీ వంటివి పనిచేస్తాయి. ఇన్‌కం ప్రూఫ్‌గా శాలరీ స్లిప్స్, బ్యాంక్ స్టేట్మెంట్స్, ఐటీ రిటర్న్స్ కావాలి.