A provincia de Pontevedra consolida a súa posición como destino líder galego tras rexistrar case 700.000 visitantes durante os meses estivais, segundo os datos presentados polo presidente da Deputación, Luis López, con motivo do Día Mundial do Turismo. O balance confirma o crecemento sostido do turismo nas Rías Baixas, cun incremento do 4,25% no número de visitantes internacionais. Do total de turistas, 490.000 procedían do resto do país mentres que máis de 210.200 chegaron desde outros países, o que supón un ascenso notable na captación de turismo foráneo. O destino mantén a súa posición como líder en ocupación hoteleira en Galicia cunha media do 60% e unha estancia promedio de entre dúas e tres noites. Ademais, os castelos de Soutomaior e Sobroso recibiron 20.000 visitantes, mentres que 78.058 peregrinos completaron algunha das variantes do Camiño de Santiago que atravesan a provincia. Un dato relevante é que o 58,44% dos visitantes que chegaron este verán ás Rías Baixas aínda non coñecían a provincia. "Quen descobre Rías Baixas, repite", destacou López, quen considera que este indicador reflicte tanto a capacidade de atracción de novos turistas como a fidelización dos existentes. O éxito turístico vén respaldado polo recoñecemento internacional da campaña "Cando Volves?", que acumula xa cinco premios, indicou o presidente provincial. O último, o Delfín de Prata do festival Cannes Corporate Media & TV Awards, foi recollido este xoves en Francia, onde as Rías Baixas compartiron distinción con entidades como Porsche, UEFA ou Booking. A Deputación celebrou o Día Mundial do Turismo no Palacete das MendozaDeputación de Pontevedra NOVA FERRAMENTA TECNOLÓXICA Para seguir impulsando un turismo sustentable e descentralizado, a Deputación presentou a aplicación móbil Rías Baixas Go, que inclúe cinco rutas repartidas por toda a provincia para completar a pé ou en bicicleta durante calquera época do ano. As rutas, que utilizan tecnoloxías de xeolocalización e realidade aumentada, son: Grandes legados Rías Baixas, Viaxe ao pasado Rías Baixas, Galifornia Rías Baixas, Terras lexendarias de Rías Baixas e Familias en ruta pola Rías Baixas. As persoas usuarias da app contarán coa guía de Batea, unha mascota inspirada no mexillón das Rías e respaldada por Artesanía de Galicia. Luis López coa mascota BateaDeputación de Pontevedra