తెలంగాణ అస్థిత్వం, సంస్కృతికి నిలువెత్తు రూపమైన గడించింది. హైదరాబాద్‌లోని సరూర్‌నగర్ ఇండోర్ స్టేడియంలో పర్యాటక శాఖ అత్యంత ప్రతిష్టాత్మకంగా నిర్వహించిన 'మన బతుకమ్మ సంబరాలు' ఏకంగా రెండు గిన్నిస్ వరల్డ్ రికార్డులను సొంతం చేసుకుని సరికొత్త చరిత్ర లిఖించాయి. ఈ విజయం తెలంగాణ ఆడబిడ్డల ఐక్యతకు, కళాత్మకతకు దక్కిన గౌరవంగా చెప్పవచ్చు. ఈ కార్యక్రమం కోసం ప్రత్యేకంగా తయారుచేసిన 63 అడుగుల ఎత్తైన బతుకమ్మ ప్రపంచంలోనే అత్యంత భారీ బతుకమ్మగా రికార్డు సృష్టించింది. ఈ అద్భుత కళాఖండాన్ని రూపొందించడానికి రాష్ట్ర పర్యాటక అభివృద్ధి శాఖ ఆధ్వర్యంలో సుమారు రెండు నెలల పాటు కృషి జరిగింది. పూలతో, ప్రత్యేక అలంకరణలతో కూడిన ఈ భారీ బతుకమ్మ వేదికకే ప్రధాన ఆకర్షణగా నిలిచింది. మరో రికార్డును నెలకొల్పుతూ.. ఒకేసారి 1354 మంది మహిళలు ఈ భారీ బతుకమ్మ చుట్టూ లయబద్ధంగా బతుకమ్మ ఆడారు. ఈ ప్రదర్శన 'అతిపెద్ద జానపద నృత్యం' చేసింది. వేల సంఖ్యలో మహిళలు ఒకే తాటిపై, ఒకే లయలో ఆడిన ఈ నృత్య రూపకం, తెలంగాణ మహిళా శక్తిని, సాంస్కృతిక వైభవాన్ని కళ్లకు కట్టింది. ఈ రికార్డు సాధనే లక్ష్యంగా మహిళా లోకం రోజుల తరబడి చేసిన కృషికి ఇది ఫలితం. ఈ చారిత్రక ఘట్టాన్ని తిలకించేందుకు మంత్రులు సీతక్క , జూపల్లి కృష్ణారావు, హైదరాబాద్ మేయర్ గద్వాల విజయలక్ష్మి హాజరయ్యారు. మంత్రి జూపల్లి కృష్ణారావు మాట్లాడుతూ.. ఈ విజయం ద్వారా తెలంగాణ సంస్కృతిని ప్రపంచ పటంలో నిలబెట్టామని, ఆడబిడ్డల ఐక్యత ప్రపంచానికి స్ఫూర్తినిస్తుందని పేర్కొన్నారు. మంత్రి సీతక్క మాట్లాడుతూ.. గల్లీలలో గరిట తిప్పే చేతులు నేడు గిన్నిస్ బుక్ రికార్డు సాధించే బతుకమ్మను రూపొందించడం గొప్ప శుభ పరిణామమని.. మహిళలు అన్ని రంగాలలో ఆకాశాన్ని సైతం చీల్చుకొని ముందుకు సాగాలని పిలుపునిచ్చారు. ఈ సందర్భంగా మంత్రి స్వయంగా బతుకమ్మ పాట పాడి ఉత్సవ వాతావరణాన్ని పెంచారు. ప్రజా గాయని విమలక్క సమ్మక్క సారక్క, చాకలి ఐలమ్మ వంటి వారి స్ఫూర్తిని గుర్తుచేస్తూ, మహిళల పిడికిళ్లు రేపటి భవిష్యత్తుకు మార్గదర్శకాలు అవుతాయని తెలిపారు. ప్రముఖ గాయని గీతా మాధురి బతుకమ్మ గీతాలు ఆలపించి మహిళల్లో మరింత ఉత్తేజాన్ని నింపారు. ఈ విజయవంతమైన కార్యక్రమం అనంతరం, గిన్నిస్ బుక్ రికార్డుల ప్రతినిధులు ధృవీకరణ పత్రాలను మంత్రులకు అందజేశారు. ఈ రెండు రికార్డుల ద్వారా బతుకమ్మ పండుగ ప్రపంచ స్థాయిలో నిలిచి, తెలంగాణకు ప్రత్యేక గుర్తింపు తెచ్చింది.