بھارت کے ہریانہ کے ضلع سونی پت میں گزشتہ رات آنے والے زلزلہ کے باعث خوف و ہراس پھیل گیا۔غیر ملکی ذرائع ابلاغ کے مطابق ہریانہ کے ضلع سونی پت میں رات تقریباً ایک بج کر 47 منٹ پر زلزلے کے جھٹکے محسوس کیے گئے، جن کی شدت ریکٹر اسکیل پر 3.4 درج کی گئی۔ مرکز سونی پت ہی تھا، اسی وجہ سے جھٹکے واضح طور پر محسوس ہوئے۔رپورٹس کے مطابق زلزلے کے باعث لوگ نیند سے جاگ گئے اور گھبرا کر گھروں سے باہر نکل آئے۔ تاہم یہ جھٹکے معمولی نوعیت کے تھے، اس لیے کوئی جانی یا مالی نقصان کی اطلاع سامنے نہیں آئی۔ماہرین کا کہنا ہے کہ اس سطح کے زلزلے سے عام طور پر کوئی بڑا خطرہ نہیں ہوتا لیکن لوگ خوفزدہ ہو جاتے ہیں۔واضح رہے کہ جولائی میں بھی ہریانہ میں 3.3 شدت کا زلزلہ آیا تھا، جس کا مرکز روہتک کے قریب تھا۔ گزشتہ کچھ مہینوں میں ریاست کے مختلف حصوں میں کئی مرتبہ زلزلہ آچکا ہے، ان جھٹکوں کا اثر اکثر دہلی-این سی آر تک بھی پہنچتا ہے، کیونکہ یہ علاقہ زلزلوں کے خطرناک زون میں موجود ہے۔ماہرین ارضیات کے مطابق دہلی-این سی آر کا علاقہ ’سسیمک زون 4‘ میں شامل ہے، جو درمیانے سے بلند خطرے والا زلزلہ زون مانا جاتا ہے۔روس میں 7.8 شدت کا زلزلہ، سونامی الرٹ جاریدہلی کے اطراف کئی فعال فالٹ لائنس بھی موجود ہیں، جیسے دہلی-ہریدوار رج، مہندر گڑھ-دہرادون فالٹ، سوہنا فالٹ اور یمنا ریور لائنمنٹ۔ ان فالٹ لائنس کے باعث اس خطے میں زلزلے کا خطرہ زیادہ رہتا ہے۔ماہرین کے مطابق ایسے چھوٹے جھٹکوں کو سنجیدگی سے لینا چاہیے کیونکہ یہ بڑی سرگرمیوں کی ابتدائی علامت بھی ہو سکتے ہیں۔