: ఇన్వెస్ట్ చేసేందుకు ఎన్ని ఆప్షన్లు ఉన్నప్పటికీ.. చాలా మంది రిస్క్ లేని.. సురక్షితమైన పెట్టుబడి సాధనాల కోసం చూస్తుంటారు. వీటిల్లో కేంద్ర ప్రభుత్వ మద్దతు ఉన్న పోస్టాఫీస్ స్కీమ్స్ చాలా మందిని ఆకర్షిస్తుంటాయి. ఇక్కడ ఎలాంటి రిస్క్ ఉండదు. నిర్దిష్ట కాల పరిమితికి.. నిర్దిష్ట వడ్డీ రేట్ల ప్రకారం.. మీ పెట్టుబడికి తగ్గట్లుగా రాబడి వస్తుంటుంది. ఇక్కడ చాలానే ఉన్నాయి. అన్ని వర్గాల వారికి అందుబాటులో ఉన్నాయి. ఆడపిల్లల కోసం సుకన్య సమృద్ధి యోజన, ఉద్యోగుల కోసం పీపీఎఫ్, రిటైర్మెంట్ బెనిఫిట్స్ నేషనల్ సేవింగ్స్ సర్టిఫికెట్, ఇలా చాలానే ఉన్నాయి. ఇందులోనే నెలనెలా వడ్డీ అందించే పోస్టాఫీస్ మంత్లీ ఇన్‌కమ్ స్కీమ్ () కూడా ఉంది. ఇక్కడ నిర్దిష్ట పెట్టుబడిపై ప్రతి నెలా రూ. 9 వేలకుపైగా వడ్డీ అందుకోవచ్చు. పూర్తి వివరాల్ని మనం తెలుసుకుందాం.>> పోస్టాఫీస్ మంత్లీ ఇన్‌కమ్ స్కీంలో ఒకేసారి పెట్టుబడితో ప్రతి నెలా వడ్డీ రూపంలో అందుకోవచ్చు. ప్రస్తుతం ఈ పథకంలో వడ్డీ రేటు వార్షిక ప్రాతిపదికన 7.40 శాతంగా ఉంది. ఈ వడ్డీ రేట్లను కేంద్రం ప్రతి 3 నెలలకు ఓసారి సవరిస్తుంటుంది. ఈ వడ్డీ రేటు ప్రకారం.. మీ ఒక్కసారి పెట్టుబడిపై ప్రతి నెలా కచ్చితమైన ఆదాయం వస్తుంది. మీ పెట్టుబడి మళ్లీ మెచ్యూరిటీ సమయంలో తీసుకోవచ్చు. ఈ స్కీమ్ కాల పరిమితి ఐదేళ్లుగా ఉంది. అంటే ఐదేళ్ల తర్వాత మీ పెట్టుబడి మొత్తం మీకు తిరిగొస్తుంది. కనీసం రూ. 1000 తో ఈ స్కీమ్ కింద అకౌంట్ తెరవొచ్చు. సింగిల్ అకౌంట్ కింద గరిష్ఠ పెట్టుబడి పరిమితి రూ. 9 లక్షలుగా ఉంది. అదే జాయింట్ అకౌంట్ తెరిస్తే రూ. 15 లక్షల వరకు డిపాజిట్ చేయొచ్చు. ఇక్కడ ఎంత ఇన్వెస్ట్ చేస్తే నెలనెలా వడ్డీ ఎంతొస్తుందో చూద్దాం. ఒక్కసారి రూ. 1 లక్ష డిపాజిట్ చేస్తే ఐదేళ్ల వరకు ప్రతి నెలా రూ. 617 వడ్డీ వస్తుంది. అదే 5 లక్షలు జమ చేస్తే ప్రతి నెలా రూ. 3083 చొప్పున వడ్డీ వస్తుంది. సింగిల్ అకౌంట్ కింద గరిష్ఠ పెట్టుబడి రూ. 9 లక్షలు ఇన్వెస్ట్ చేసినట్లయితే ప్రతి నెలా వడ్డీ రూపంలో రూ. 5550 వస్తుంది. ఇలా సంవత్సరానికి వడ్డీతోనే రూ. 66,600 వస్తుంది. ఐదేళ్లలో వడ్డీతో రూ. 3,33,000 వస్తుంది. జాయింట్ అకౌంట్ కింద గరిష్ఠ పెట్టుబడి రూ. 15 లక్షలపై ప్రతి నెలా వడ్డీ రూ. 9,250 వస్తుంది. ఇలా సంవత్సరానికి రూ. 1,11,000 వస్తుంది. ఐదేళ్లలో వడ్డీ రూపంలో రూ. 5.55 లక్షలు వస్తుంది. అంటే మొత్తం రూ. 20 లక్షలకుపైగా వస్తుంది. విత్‌డ్రా విషయానికి వస్తే ఏడాదిలోపు డబ్బులు విత్‌డ్రా చేసేందుకు వీల్లేదు. 1-3 ఏళ్ల మధ్య విత్‌డ్రా చేస్తే డిపాజిట్‌లో 2 శాతం పెనాల్టీ ఉంటుంది. 3-5 ఏళ్ల మధ్య విత్‌డ్రాపై పెనాల్టీ ఒక శాతంగా ఉంది. ఇక్కడ వడ్డీ నేరుగా పోస్టాఫీస్ సేవింగ్స్ అకౌంట్‌లో జమవుతుంది.