కీలక మ్యాచ్‌లో సౌతాఫ్రికా ఘన విజయం సాధించింది.. ఈ విజయంతో సౌతాఫ్రికాతో పాటు భారత్ కూడా తన సెమీస్ ఆశలు సజీవం చేసుకుంది. అహ్మదాబాద్ వేదికగా జరిగిన ఈ మ్యాచ్‌లో సౌతాఫ్రికా జట్టు డామినేటింగ్ విక్టరీతో సెమీస్ బెర్త్ దాదాపు కన్ఫార్మ్ చేసుకుంది. వెస్టిండీస్ 20 ఓవర్లలో 176/8 పరుగులు చేయగా సౌతాఫ్రికా 16.1 ఓవర్లలో 177/1తో ఘన విజయం సాధించింది.నరేంద్ర మోదీ క్రికెట్ స్టేడియం వేదికగా జరిగిన ఈ మ్యాచ్‌లో టాస్ గెలిచిన ఎయిడెన్ మార్కరమ్ బౌలింగ్ ఎంచుకున్నాడు. దాంతో వెస్టిండీస్ జట్టు తొలుత బ్యాటింగ్‌కి వచ్చింది. ఓపెనర్లు బ్రాండన్ కింగ్ - షై హోప్ తొలి రెండు ఓవర్లలో 29 పరుగులు రాబట్టి మంచి ఆరంభమే ఇచ్చారు. అయితే, ఆ తర్వాత విండీస్ వెంటవెంటనే వికెట్లు కోల్పోయింది. పవర్ ప్లేలోనే నాలుగు వికెట్లు కోల్పోయింది. 43 పరుగులకే నాలుగు వికెట్లు కోల్పోగా 10.2 ఓవర్లకే ఏడు వికెట్లు కోల్పోయింది. 83 పరుగులకే 7 వికెట్లు కోల్పోవడంతో వెస్టిండీస్ 120 పరుగుల లోపే కట్టడి అవుతుందని అందరూ భావించారు. కానీ జేసన్ హోల్డర్, రొమారియో షెఫర్డ్ మరో వికెట్ పడకుండా కాపాడటంతో 20 ఓవర్లలో 8 వికెట్ల నష్టానికి 176 పరుగులు చేసింది. షెఫర్డ్ 52 పరుగులతో నాటౌట్‌గా నిలవగా, హోల్డర్ 49 పరుగులతో ఆఖరి బంతికి రనౌట్ అయ్యాడు. విండీస్ నిర్దేశించిన 177 పరుగుల లక్ష్యంతో బరిలోకి దిగిన సౌతాఫ్రికా జట్టు తమ మార్క్ బ్యాటింగ్‌తో రెచ్చిపోయింది. ఓపెనర్లు ఎయిడెన్ మార్కరమ్, క్వింటన్ డికాక్ తొలి వికెట్‌కు 95 పరుగుల భాగస్వామ్యం నెలకొల్పారు. ఈ ఇద్దరూ పవర్ ప్లేలో 69 పరుగులు నమోదు చేయడం విశేషం. 24 బంతుల్లో నాలుగు ఫోర్లు, నాలుగు సిక్సర్లతో 47 పరుగులు చేసిన డికాక్ 8వ ఓవర్‌లో అవుటయ్యాడు. కెప్టెన్ ఎయిడెన్ మార్కరమ్ ఈ టోర్నీలో మూడో హాఫ్ సెంచరీ నమోదు చేయడం విశేషం. 27 బంతుల్లోనే మార్కరమ్ తన హాఫ్ సెంచరీ పూర్తి చేసుకున్నాడు. డికాక్ అవుటైన తర్వాత క్రీజులోకి వచ్చిన ర్యాన్ రికెల్టన్ బౌండరీలతో స్కోర్ బోర్డును పరుగులు పెట్టించాడు. మార్కరమ్ కూడా సిక్సర్లు బాదడంతో సౌతాఫ్రికా 16.1 ఓవర్లలోనే 177 పరుగులు చేసి విజయం సాధించింది. ఎయిడెన్ మార్కరమ్ 46 బంతుల్లో 7 ఫోర్లు, 4 సిక్సర్లతో 82 పరుగులు చేయగా, ర్యాన్ రికెల్టన్ 28 బంతుల్లో 4 ఫోర్లు, 2 సిక్సర్లతో 45 పరుగులు చేశాడు. ఈ విజయంతో సౌతాఫ్రికా సూపర్ 8 గ్రూప్ 1 పాయింట్ల టేబుల్‌లో అగ్ర స్థానానికి చేరుకుంది. ఈ టీ20 వరల్డ్‌కప్‌లో సౌతాఫ్రికా ఒక్క ఓటమి కూడా ఎరుగకుండా వరుస విజయాలతో దూసుకుపోవడం విశేషం.