పాకిస్తాన్ మాజీ క్రికెటర్ మరోసారి వార్తల్లో నిలిచారు. మైదానంలోనే కాదు, వ్యక్తిగత జీవితంలోనూ ఎప్పటికప్పుడు సంచలనాలకు కేరాఫ్ అడ్రస్‌గా మారిన షోయబ్, ఇప్పుడు నాలుగో పెళ్లి వార్తలతో సోషల్ మీడియాలో హల్‌చల్ చేస్తున్నారు. ఇటీవల రెండు సంవత్సరాల కిందట పాకిస్తానీ నటి సనా జావెద్‌ను వివాహం చేసుకున్న షోయబ్, ఇప్పుడు మరో నటి వనీజా సత్తార్‌తో పెళ్లి చేసుకోబోతున్నాడన్న ప్రచారం ఊపందుకుంది.ఫిబ్రవరి 27న వీరి వివాహం జరగనుందంటూ సోషల్ మీడియాలో అనధికారిక కథనాలు వైరల్ అవుతున్నాయి. అయితే ఈ విషయంపై ఇప్పటివరకు షోయబ్ కానీ, వనీజా కానీ అధికారికంగా స్పందించలేదు. అయినప్పటికీ, ఈ వార్తలు పాక్–ఇండియా మీడియాలో హాట్ టాపిక్‌గా మారాయి.గతంలో షోయబ్, భారత టెన్నిస్ స్టార్ సానియా మీర్జాను 2010లో హైదరాబాద్‌లో వివాహం చేసుకున్నాడు. ఈ క్రాస్‌బోర్డర్ లవ్ స్టోరీ అప్పట్లో ప్రపంచవ్యాప్తంగా సంచలనం సృష్టించింది. వీరికి ఇజ్హాన్ అనే కుమారుడు కూడా ఉన్నాడు. అయితే కొన్నేళ్లుగా విభేదాల నేపథ్యంలో, 2024లో వీరు విడాకులు ప్రకటించారు. ప్రస్తుతం సానియా దుబాయ్‌లో కుమారుడితో నివసిస్తూ తన జీవితాన్ని ముందుకు తీసుకెళ్తున్నారు.సానియాతో విడాకులు తీసుకున్న కొద్ది వారాల్లోనే షోయబ్, సనా జావేద్‌ను పెళ్లి చేసుకోవడం మరోసారి షాక్ ఇచ్చింది. లాహోర్‌లో జరిగిన వారి సన్నిహిత వివాహ వేడుక ఫోటోలు సోషల్ మీడియాలో వైరల్ అయ్యాయి. గత రెండేళ్లుగా వీరు ప్రశాంతంగా కుటుంబ జీవితం గడుపుతున్నట్లు కనిపించినా, తాజా రూమర్స్ వారి బంధంపై ప్రశ్నలు లేవనెత్తుతున్నాయి.ఇదిలా ఉండగా, ఇటీవల షోయబ్ పేరు నటి లైబా ఖాన్‌తో కూడా జతకట్టారనే ప్రచారం జరిగింది. కానీ ఆమె ఇప్పటికే ఈ ఏడాది మదీనాలో జవాద్‌ను వివాహం చేసుకుని ఫోటోలు షేర్ చేయడంతో, ఆ వార్తలు పూర్తిగా అవాస్తవమని తేలిపోయాయి.షోయబ్ మొదటి వివాహం 2000వ సంవత్సరంలో అయేషా సిద్ధిఖితో జరిగింది. కుటుంబ సమ్మతి లేకుండా జరిగిన ఈ పెళ్లి, ఆ వెంటనే విడాకులతో ముగిసి పెద్ద వివాదంగా మారింది. అప్పట్లో వచ్చిన ఆరోపణలు అతడి ఇమేజ్‌పై ప్రభావం చూపాయి. ఇప్పటికే మూడు పెళ్లిళ్లు, రెండు విడాకులతో చర్చనీయాంశంగా మారిన షోయబ్, ఇప్పుడు నిజంగానే నాలుగో పెళ్లికి సిద్ధమవుతున్నాడా? లేక ఇవన్నీ కేవలం సోషల్ మీడియా రూమర్స్ మాత్రమేనా? అన్నది ఇంకా స్పష్టత రావాల్సి ఉంది. అధికారిక ప్రకటన వచ్చే వరకు అభిమానులు ఉత్కంఠగా ఎదురుచూస్తున్నారు.