വയനാട്ടിൽ സർക്കാർ നിർമ്മിച്ച് നൽകിയ ടൗൺഷിപ്പിന്റെ ഉദ്ഘാടന ചിത്രങ്ങൾക്കും വാർത്തകൾക്കുമൊപ്പം, മുഖ്യമന്ത്രി പിണറായി വിജയനെക്കുറിച്ചുള്ള ഒരു പോസ്റ്റും ഇപ്പോൾ വൈറലായി മാറുകയാണ്. ഒരുകാലത്ത് പിണറായി വിജയനെന്ന രാഷ്ട്രീയക്കാരനെ വിദ്വേഷത്തോടെ നോക്കിക്കണ്ടിരുന്ന താൻ, എങ്ങനെ അദ്ദേഹത്തിന്റെ വലിയ ആരാധകനായി മാറി എന്ന വികാരനിർഭരമായ മാറ്റമാണ് മുകേഷ് മോഹൻ തന്റെ കുറിപ്പിലൂടെ വിവരിയ്ക്കുന്നത്.യൗവനകാലത്ത് പിണറായി വിജയനെ ക്രൂരനായ ഒരു രാഷ്ട്രീയക്കാരനായിട്ടാണ് താൻ കണ്ടിരുന്നതെന്ന് മുകേഷ് കുറിക്കുന്നു. വി.എസ്. അച്യുതാനന്ദനെ ജനകീയതയുടെ വെള്ളിനക്ഷത്രമായി കണ്ടിരുന്ന അക്കാലത്ത്, മാധ്യമങ്ങൾ ചമച്ചെടുത്ത കള്ളക്കഥകളിലെ വില്ലൻ വേഷമാണ് താൻ പിണറായിക്ക് നൽകിയിരുന്നതെന്നും അദ്ദേഹം വെളിപ്പെടുത്തുന്നു.2015-ലെ പ്രവാസ കാലത്ത് അബുദാബിയിൽ വെച്ച് സുധീർ ഇബ്രാഹിം എന്ന സഖാവിനെ കണ്ടുമുട്ടിയതാണ് തന്റെ കാഴ്ചപ്പാടുകൾ തിരുത്തിയതെന്ന് കുറിപ്പിൽ പറയുന്നു. വാക്കുകളിലല്ല, പ്രവൃത്തിയിലാണ് ഒരു കമ്മ്യൂണിസ്റ്റിന്റെ കരുത്തെന്ന് തിരിച്ചറിഞ്ഞ ആ നാളുകളാണ് മാധ്യമങ്ങൾ മൂടിവെച്ച പിണറായി വിജയൻ എന്ന വിപ്ലവകാരിയെ തനിക്ക് പരിചയപ്പെടുത്തിയതെന്ന് മുകേഷ് വ്യക്തമാക്കുന്നു.ALSO READ: പ്രവാസി മലയാളികളുടെ സുരക്ഷ ഉറപ്പാക്കണം; പ്രധാനമന്ത്രിക്ക് കത്തയച്ച് മുഖ്യമന്ത്രി പിണറായി വിജയൻപോസ്റ്റിന്റെ പൂർണരൂപം“നല്ലതോന്നും എന്റെ കണ്മണിമണ്ണിൽ നിന്നും അങ്ങനങ്ങു മായുകില്ലെടി.കണ്ണുനീർ തുടച്ചിടാൻ ഒരാൾകരം പിടിച്ചു നമ്മളെ നടത്തിടുന്നെടി..”ഇന്ന് വയനാട്ടിൽ സർക്കാർ നിർമിച്ചു നൽകിയ ടൗൺഷിപ്പിന്റെ ഉദ്ഘാടനം സംബന്ധിച്ച ചിത്രങ്ങൾ വാർത്തകൾ ഒക്കെ കണ്ടു വരുമ്പോൾ ഞാൻ ഓർക്കുകയായിരുന്നു…വർഷങ്ങൾക്കു മുമ്പ് യൗവന കാലത്ത് കൗമാര കാലത്തൊക്കെ പിണറായി എന്ന ക്രൂരനായ ഒരു രാഷ്ട്രീയക്കാരനോടുള്ള അമർഷവും വിദ്വേഷവും ഒക്കെ മനസ്സിൽ കൊണ്ടുനടന്ന ഒരു ഇടതുപക്ഷ രാഷ്ട്രീയ അനുഭാവിയിൽ നിന്നും ഇന്ന് പിണറായി എന്ന പേരിനോട് തന്നെ അകമഴിഞ്ഞ ആരാധനയും സ്നേഹവും ഉള്ള ഒരു വ്യക്തിയായി ഞാൻ മാറിയ ഒരു കാലഘട്ടത്തെക്കുറിച്ച്..മനസ്സിൽ V. S എന്ന ജനകീയതയുടെ വെള്ളിനക്ഷത്രം ഉദിച്ചുനിന്ന കാലം. അന്ന് പിണറായി വിജയൻ എന്ന പേര് എനിക്ക് അപരിചിതത്വത്തിന്റെയും പരുക്കൻ ഭാവങ്ങളുടെയും ഒരു പര്യായമായിരുന്നു. മാധ്യമങ്ങൾ ചമച്ചെടുത്ത കപടക്കഥകളിലെ വില്ലൻ വേഷം ആ രൂപത്തിന് മേൽ ഞാൻ അന്ധമായി ചാർത്തിക്കൊടുത്തു. ക്രൂരതയുടെ ഭാവമാണെന്നും കരുണയുടെ തുള്ളികളില്ലാത്ത കല്ലിന്റെ കാർക്കശ്യമാണെന്നും ഞാൻ വിശ്വസിച്ചു.എന്നാൽ, കാലമെന്ന വലിയ അധ്യാപകൻ എന്റെ കാഴ്ചപ്പാടുകളുടെ തിരുത്തൽ എഴുതുകയായിരുന്നു. ആ മാറ്റത്തിന്റെ തുടക്കം കേരളത്തിന്റെ അതിരുകൾക്ക് അപ്പുറത്തായിരുന്നു.2015-ലെ ആ പ്രവാസ നാളുകൾ എനിക്കൊരിക്കലും മറക്കാനാവില്ല. അബുദാബിയിലെ ചുട്ടുപൊള്ളുന്ന മണൽക്കാറ്റുകൾക്കിടയിൽ, ജീവിതം കരുപ്പിടിപ്പിക്കാൻ ഓടുന്നതിനിടയിലാണ് ഞാൻ Sudheer Ibrahim (സുധീറിക്ക) എന്ന സഖാവിനെ കണ്ടുമുട്ടുന്നത്.മണലാരണ്യത്തിലെ തണൽമരം പോലെ അദ്ദേഹം എനിക്ക് പിണറായി വിജയൻ എന്ന പച്ചയായ മനുഷ്യനെ പരിചയപ്പെടുത്തി തന്നു. വാക്കുകളിലല്ല, പ്രവൃത്തിയിലാണ് ഒരു കമ്മ്യൂണിസ്റ്റിന്റെ കരുത്തെന്ന് അദ്ദേഹം പഠിപ്പിച്ചുതന്നു. സുധീറിക്കയുടെ വാക്കുകളിലൂടെയാണ്, മാധ്യമങ്ങൾ മൂടിവെച്ച ആ വലിയ വിപ്ലവകാരിയെ ഞാൻ തിരിച്ചറിഞ്ഞത്.അടിമുടി പാർട്ടിയായ, പ്രസ്ഥാനത്തിന്റെ ജീവശ്വാസമായ പിണറായി വിജയൻ എന്റെ ഉള്ളിൽ ഒരു വിസ്മയമായി വളരാൻ തുടങ്ങിയത് ആ സായാഹ്നങ്ങളിലായിരുന്നു.അദ്ദേഹം പ്രസ്ഥാനത്തിന്റെ അചഞ്ചലമായ ശിലയാണ്. വ്യക്തിയെന്ന ഭാവത്തെ പാർട്ടി എന്ന മഹാസമുദ്രത്തിൽ ഹോമിച്ചൊരാൾ. അധികാരത്തിന്റെ ചില്ലുമേടകളിലോ മാധ്യമങ്ങളുടെ സ്തുതിപാഠങ്ങളിലോ മയങ്ങാത്ത കനൽവഴികളിലെ സഞ്ചാരി. മാധ്യമങ്ങളുടെ പരിലാളനകൾ ആവശ്യമില്ലാത്ത, നിലപാടുകളുടെ കനൽവഴികളിലൂടെ മാത്രം സഞ്ചരിക്കുന്ന ആ രാഷ്ട്രീയ പക്വത എന്നെ അത്ഭുതപ്പെടുത്തി.കേരളം പ്രളയജലത്തിൽ മുങ്ങിത്താഴ്ന്നപ്പോഴും, കോവിഡ് എന്ന മഹാമാരിയുടെ കരിനിഴൽ വീണപ്പോഴും ആ ശബ്ദം ഒരു കാവൽവിളക്കായി നമുക്ക് കൂട്ടിരുന്നു. ഭയത്തിന്റെ ഇരുളിൽ പതറിപ്പോയ ഒരു ജനതയെ “നമ്മൾ അതിജീവിക്കും” എന്ന ഒരൊറ്റ വാചകത്തിന്റെ തണലിൽ അദ്ദേഹം ഒന്നിപ്പിച്ചു. അതൊരു ഭരണാധികാരിയുടേതല്ല, ഒരു ജനതയുടെ മുഴുവൻ ഭാരവുമേറ്റെടുക്കുന്ന കരുത്തനായ ഒരു ക്യാപ്റ്റന്റെ ആത്മവിശ്വാസമായിരുന്നു. ദുരന്തമുഖങ്ങളിൽ പതറാതെ നയിക്കുന്ന ആ കേഡർഷിപ്പ് ലോകത്തിന് തന്നെ മാതൃകയായി മാറി.കഴിഞ്ഞ പത്തു വർഷക്കാലം കേരളത്തിന്റെ ചരിത്രരേഖകളിൽ സുവർണ്ണാക്ഷരങ്ങളാൽ എഴുതപ്പെട്ടവയാണ്. വികസനത്തിന്റെ പുതിയ ചക്രവാളങ്ങൾ തേടിയുള്ള പ്രയാണത്തിൽ, അസാധ്യമെന്ന് കരുതിയ പദ്ധതികൾ അദ്ദേഹം യാഥാർത്ഥ്യമാക്കി. കേരളത്തിന്റെ രാഷ്ട്രീയ ചരിത്രത്തിലെ പതിവുകളെ തിരുത്തിക്കുറിച്ചുകൊണ്ട്, ജനഹൃദയങ്ങളിൽ ആഴ്ന്നിറങ്ങിയ ഭരണമികവിലൂടെ അദ്ദേഹം ആദ്യമായി തുടർഭരണം എന്ന വിസ്മയം തീർത്തു. കൂട്ടുനിൽക്കുന്നവരിലെ കപടന്മാരെയും സ്തുതിപാഠകരെയും നിശബ്ദമായ ഒരു നോട്ടം കൊണ്ട് തിരിച്ചറിയാനുള്ള ആ രാഷ്ട്രീയ ചാണക്യത, വർഷങ്ങളോളം തീച്ചൂളയിൽ വെന്തുരുകി വന്നവർക്ക് മാത്രം അവകാശപ്പെട്ടതാണ്.സഖാക്കളോടും പാർട്ടി കുടുംബങ്ങളോടും അദ്ദേഹം പുലർത്തുന്ന സ്നേഹം പുറമെ കാണുന്ന ആ പാറപോലെയുള്ള കാർക്കശ്യത്തിനുള്ളിലെ മധുരമാണ്. വീണുപോയവനെ തോളിലേറ്റുന്ന, തളർന്നവന് തണലാകുന്ന ആ ഹൃദയം പലപ്പോഴും മാധ്യമവാർത്തകളിൽ ഇടംപിടിച്ചില്ല. പക്ഷേ, അത് സാധാരണക്കാരായ ഓരോ സഖാവിന്റെയും ഉള്ളിൽ ആഴത്തിൽ പതിഞ്ഞു കിടപ്പുണ്ട്. സ്നേഹിക്കാൻ മാത്രമല്ല, കരുത്തുറ്റ കൈകൾ കൊണ്ട് സംരക്ഷിക്കാനും അറിയുന്ന ഒരു നേതാവ്.ഇന്ന് കേരളം ഉറ്റുനോക്കുന്നത് ആ മൂന്നാം ഊഴത്തിലേക്കാണ്. ആടിയുലയാത്ത നിശ്ചയദാർഢ്യത്തോടെ, വികസനത്തിന്റെ പുതുയുഗത്തിലേക്ക് നാടിനെ നയിക്കാൻ ആ കപ്പിത്താൻ വീണ്ടും അമരത്തുണ്ടാകുമെന്ന് ഞാൻ ഉറച്ചു വിശ്വസിക്കുന്നു. പ്രതിസന്ധികളുടെ വേലിയേറ്റങ്ങളിൽ തകരാത്ത ആ പടക്കപ്പൽ, ഇടതുപക്ഷത്തിന്റെ ചെങ്കൊടി ഉയർത്തിപ്പിടിച്ച് മൂന്നാം തവണയും വിജയതീരമണയുക തന്നെ ചെയ്യും.വിരോധത്തിന്റെ കയ്പുനീരിൽ നിന്നും തുടങ്ങിയ ആ യാത്ര ഇന്ന് ആരാധനയുടെയും ബഹുമാനത്തിന്റെയും അത്യുന്നതിയിൽ എത്തിനിൽക്കുന്നു. അബുദാബിയിലെ ആ നാളുകളിൽ സുധീറിക്ക പകർന്നുതന്ന ആ ബോധ്യം ഇന്ന് എന്റെ രാഷ്ട്രീയ ജീവിതത്തിലെ ഏറ്റവും വലിയ സത്യമാണ്.പിണറായി വിജയൻ—അതൊരു വ്യക്തിയല്ല..അടിയുലയാത്ത വിശ്വാസത്തിന്റെ കരുത്തുറ്റ ഒരു വിപ്ലവമാണ്!കേരളത്തിന്റെ കരുത്താണ്!“നല്ലതോന്നും എന്റെ കണ്മണിമണ്ണിൽ നിന്നും അങ്ങനങ്ങു മായുകില്ലെടി.കണ്ണുനീർ തുടച്ചിടാൻ ഒരാൾകരം പിടിച്ചു നമ്മളെ നടത്തിടുന്നെടി..”മുകേഷ് മോഹൻ.The post ‘പിണറായി വിജയൻ; അതൊരു വ്യക്തിയല്ല, അടിയുലയാത്ത വിശ്വാസത്തിന്റെ കരുത്തുറ്റ വിപ്ലവം’; വൈറലായി ഫേസ്ബുക്ക് കുറിപ്പ് appeared first on Kairali News | Kairali News Live.